沙沙密卡的彩色世界

 

我那個年代嘅女孩子，小時候一定玩過紙公仔。
無錢買芭比，無錢買椰菜娃娃
但係行過文具鋪花十蚊八蚊就可以買到紙公仔

 
 細個著得最多嘅一家係番學嘅皮鞋

魔術貼，綁帶，啪鈕⋯⋯
雖然皮鞋款式多，但係對於幼稚園同小學生嚟講
魔術貼當然係最好嘅選擇啦
面對一條長長嘅鞋帶，手指又未夠靈活
當年有唔少同學因為咁而要向老師求助呢！

你問我，我一定會同你講"有邊個小朋友係唔鍾意味精㗎！"
細細個食零食，唔係食糖，就係食薯片
食薯片除咗因為佢脆，有好大原因係因為佢上面啲味精粉真係好好味
係我嘅零食名單入面，媽咪麵，牛仔片都應該可以爭”味精之王"呢個稱號
好，今日先分享一個我同牛仔片嘅故事俾大家聽啦⋯⋯

你嘅相簿入面，有無出現過一張同海馬嘅合照呢？
 
有，就真係令人羨慕啦！
呢隻海馬，係以前海洋公園嘅標誌，
當年朋友去到海洋公園，一定會同海馬嚟個合照，
我呢，住係新界嘅小朋友，爸爸媽媽又唔會帶我哋山長水遠去玩
（當時要搭地鐵過海，一年數埋都唔過三次）
見到同學仔朋友仔屋企有張同海馬嘅合照，真係威過上台拎獎㗎！
當年，見到海洋公園嘅廣告，真係眼仔都發光
一直等等等，終於係我四年班嘅時候，俾我抽中咗去海洋公園參觀！
除咗摸到殺人鯨（係呀，當時殺人鯨仲未死）
令我印像最深嘅就係海洋公園嘅纜車

 
細個無咩去動物園嘅經驗
只係記得當年跟爸爸媽媽一齊去過荔園，
入而有個好多鐵通嘅地方，每堆鐵通都圍住一種動物
大家都圍係外面指手劃腳⋯⋯
呢個就係我印像中嘅動物園
由於動物們都習慣咗俾人圍觀嘅生活
佢哋都會對呢班圍觀者不屑一顧
但係我呢啲無咩機會見到真動物嘅小朋友，
緊係想睇下啲動物郁下啦
細個以為動物係會識聽人話嘅
只要我講反話，激嬲佢哋，佢哋就會郁⋯⋯
我試見到孔雀同佢講你好醜樣（希望佢會開屏）⋯⋯

夏日炎炎，大家都好鐘意去游水
泳池啦，海灘啦，只要浸係水入面諗起都涼快
但係，全部都無我份⋯⋯因為我都唔識游水⋯⋯
 

慶幸自己生長係一個"有童年"嘅年代，每日做完功課，就可以瞓晏覺畫公仔睇卡通片。
我相信，90年代嘅卡通片，一定係最精彩最好睇嘅。
美少女戰士，新魔神英雄傳，四驅兄弟，長腿叔叔等等等都係我心中留底左一個好重要嘅位置。
而當唔少女同學夢想成為美少女戰士嘅時候，我就希望可以變成佢－－一隻粉紅色嘅豬 －－寶妮

 
最近身邊好多朋友都話要移民
佢哋都覺得而家嘅香港太亂，又無地方住，又好似越嚟越無自由咁
呢個話要移民去美國，嗰個又話要嫁去台灣
突然間好想唱呢首歌
"香港是我心 一顆不變心 實在極不願 移民外國做二等公民" 
記得讀緊小二時候，佢離1997仲有幾年時間
身邊啲同學仔，朋友仔，親戚個個都離開香港
呢個去美國，呢個去加拿大，呢個去澳洲
五湖四海，真係咩地方都有，
爸爸話，如果唔係佢唔識英文，可能一早都移咗民