沙沙密卡的彩色世界

你問我，我一定會同你講"有邊個小朋友係唔鍾意味精㗎！"

細細個食零食，唔係食糖，就係食薯片
食薯片除咗因為佢脆，有好大原因係因為佢上面啲味精粉真係好好味

係我嘅零食名單入面，媽咪麵，牛仔片都應該可以爭”味精之王"呢個稱號

好，今日先分享一個我同牛仔片嘅故事俾大家聽啦⋯⋯

細細個，係領匯未入侵樓下商場之前，除咗文具鋪，我最鐘意行嘅就係士多
當年一包細嘅牛仔片都只係買＄1.5
儲起＄4，買包牛仔片，買4粒蜜蜂糖加包媽咪麵岩岩好用晒
雖然牛仔片一包空氣佔咗七成，食得嘅少到只係夠攝牙罅
但係佢實在太好味，間唔中我都會買一包嚟食

記得有一次當我買完番到屋企諗住打開嚟食嗰陣
一打開，就發現裡面只係得⋯⋯兩塊

2蚊、2塊 

點解得2塊㗎？呃錢呀！少都唔係少成咁呀？

當時我真係好想落街問個嬸嬸，點解你包牛仔片得兩塊
但係我又怕個嬸嬸以為我食完，講大話嚟玩嘢

食完嗰兩塊牛仔片，我真係喊咗出嚟⋯⋯

從此，我對牛仔片又愛又怕
我真係好想食，但係又怕裡面又係得兩塊
所以，而家每次我買牛仔片之前都會扮晒嘢，搖下佢⋯⋯

當有一日你係超級市場見到一個女仔係咁搖人哋啲牛仔片，

嗰個就係我啦⋯⋯